Адыгэ лъэпкъым ишъыгъо-шӀэжь Мафэ иегъэжьапӀэу Шэуджэн районым илъэпкъ культурэ игупчэ иӀофышӀэхэмрэ япащэу Бэджэкъо Заурбийрэ къуаджэу Пщычэу шӀэжь сынэу дэтым еблэгъагъэх. Хьатыгъужъыкъое коим «ШӀэжь такъикъ» сыным щашӀыгъ. КъекӀолӀагъэхэр агу етыгъэу Ӏофыгъом телъытагъэу къыщыгущыӀагъэх, тхьалъэӀу щашӀыгъ, дыуахьхэр къахьыгъ. Купым ыцӀэкӀэ Юсып Зауркъан лъэшэу ӀупкӀэу, чанэу, шъхьэихыгъэу къыщыгущыӀагъ ыкӀи ежь иеплъыкӀэ пхъашэу къыриӀотыкӀыгъ. ШӀэжь такъикъыр Кавказ заом хэкӀодагъэмэ шъыгъо уахътэу афашӀыгъ.

Лъэпкъ культурэм игупчэу Хьакурынэхьаблэ дэтым шъыгъо-шӀэжь мафэр нахь шъуамбгъоу хагъэунэфыкӀыгъ. «Тятэжъымэ ягугъу дахэкӀэ тэжъугъэшӀы» зыфиӀорэ пчыхьэзэхьахьэр лъэпкъыцӀэ зиӀэ орэдыӀо купэу «Джэныкъом» щызэхищагъ. Зэо тарихъыр, ащ ехьылӀэгъэ орэдыжъэу лъэпкъым къыфэнэжьыгъэхэр, фэхыгъэмэ ялӀыблэнагъэрэ бэ гущыӀэгъу ашӀыгъэр ыкӀи зэрыгушхуагъэхэр. Орэдыжъхэми зэкӀэ къекӀолӀагъэхэм агу рихьыпэу едэӀугъэх. Гупчэм къеблэгъагъэх ыкӀи ягущыӀэ къыхалъхьагъ Шэуджэн районым ипащэу Аулъэ Рэщыд, районным и Адыгэ хасэ ипащэу Ламыкъо Эдуард, Мамхыгъэ мэщытым и ефэндэу Хьагъундэкъо Азэмат, хьакӀэшхохэу ХъокӀон Хьамед ыкӀи Сихъу СултӀан.