Къалэу Мыекъуапэ Международнэ форумэу «Дунаим тет лъэпкъ цIыкIумэ абзэрэ якультурэрэ икъэухъумэн фэгъэхьыгъ» зыфиIорэр щырекIокIыгъ. Ар республикэр илъэсишъэ зэрэхъугъэм ипэгъокIэу щытыгъ. Форумым кIэщакIо фэхъугъэр Адыгэ къэралыгъо университетым и Адыгэ филологиемрэ культурэмрэ яфакультет.
Мыщ къырагъэблэгъагъэх республикэм ирайонхэм ныдэлъфыбзэм дэлажьэхэрэ кIэлэегъэджэ-практикхэу, методикэ гъэшIэгъон зыIэкIэлъхэу, проектхэр зиIэхэу къэзгъэлъэгъон зылъэкIыщтыхэр. ЗэIукIэм темэ шъхьаIэу иIагъэр ныдэлъфыбзэмрэ, лъэпкъ культурэмрэ ары. Ти район иеджэпIэ зэфэшъхьафхэм аIут кIэлэегъаджэхэу Нэшъулъэщэ Саудэт, Чэтэжъыхьэ Эм, Хьаткъо Сусан, ХьакIэмыз Фатим, Къуижъ Замир ыкIи адыгабзэмкIэ метод объединением ипащэу Гъыщ Нахьмэт ягъусэу форумым хэлэжьагъэх. ЕджэпIэ зэфэшъхьафхэм ащеджэрэ кIэлэеджакIохэу я 8-11-рэ классхэм арысхэм ащыщхэри ягъусагъэх.
Апэрэ мафэм конференцие ин рекIокIыгъ. ЯтIонэрэ мафэм «Воркшоп» зыфаIоу, тэ семинаркIэ тызаджэрэр щыIагъ. Ащ Осетием, Дагестан ыкIи республикэм ирайонхэм къарыкIыгъэ кIэлэегъэджэхэу ныдэлъфыбзэм изэгъэшIэн фэлажьэхэрэр гущыIэгъу щызэфэхъугъэх. Ахэр бзэм изэгъэшIэнкIэ амалышIоу аIэкIэлъхэмкIэ зэдэгощагъэх.
Ащ дыкIыгъоу шIэныгъэ гупчэу «АдыгLand» зыфиIорэр къызэIуахыгъ кIэлэеджакIохэу республикэм исхэм апае. Ар очнэ-заочнэ еджапIэу щытыщт. КIэлэеджакIохэр адыгабзэмкIэ лъэпкъ культурэр, лъэпкъ тарихъыр, литературэр, ныдэлъфыбзэр нахь ашIогъэшIэгъонэу, куоу ашIэным пае проект инэу щыт.
Мыщ нэмыкIэу етIани проектэу «Черкесский олененок» зыфиIорэ онлайн-викторинэр атIупщыгъ. Ар зэбгъэпшэн плъэкIыщтыр кIэлэпIун-гъэсэным фэгъэхьыгъэ конкурсэу «Русский медвежонок» зыфаIорэр ары.
Проектэу «АдыгLand» зыфиIорэм ишIуагъэкIэ илъэсым ренэу сабыйхэр адыгэ культурэм, адыгабзэм изэгъэшIэным идунай хэщагъэ хъущтых. КIэлэеджакIохэр илъэсым къыкIоцI мазэм зэ егъэджэгъу сыхьатхэр яIэу кIохэзэ ашIыщт. Ныдэлъфыбзэм изэгъэшIэн нахь фэщагъэхэу кIэлэеджэкIо нэбгырибгъу ти район щыщхэу ащ хэлэжьэщтых.
— Форумым щызэхащагъэхэм зэкIэми а зы Iофыр ары тшIэрэр, а зы гумэкIыгъор ары тиIэр. Лъэпкъым ыбзэ, икультурэ дгъэкIоды хъущтэп. Лъэшэу ишIуагъэ мы зэIукIэм къэкIуагъ. Форумым икIэщакIохэм тхьашъуегъэпсэу ятэIо, тигуапэу тыхэлэжьагъ. Проектхэу кIэлэеджакIохэм апае къызэIуахыгъэхэм яшIуагъэ къэкIонкIэ тэгугъэ, тэри зэрытфэлъэкIэу тиIоф дгъэцэкIэщт, ныдэлъфыбзэр шIу ядгъэлъэгъущт, едгъэджэщтых, — къеIуатэ Гъыщ Нахьмэт.